Grimdalstunet

1. november 1899 kom Anne Grimdalen til verda på garden Grimdalen i Skafså. Lite visste verken ho eller familien hennar om kva framtid den spedbygde jenta skulle få.

Anne Grimdalen er rekna blant våre fremste bilethoggarar i perioden frå mellomkrigstida og fram til 1960-talet. Med betydelege og monumentale verk står ho i ei særstilling som kvinneleg utøvar av faget. 
Grimdalstunet vart museum i 1965. Dette museet er spesielt fordi alle bygningane på tunet stod her då Anne vaks opp og mange av dei lenge før det. Dei er ikkje flytta hit for å laga eit museum slik ein har gjort mange andre plassar. 
I 1973 opna skulpturhuset, som er det eldste av dei fire skulpturmusea i Vest-Telemark. Skulpturhuset ligg vakkert og monumentalt i landskapet tett inn til det gamle gardsanlegget i Skafså.