Nystaul

Om

Nystaul er ein geitestaul som driv med ysting av geiteprim (lokalt ord for geitost) og enkel servering på ein staul høgt i lendet innerst i ein veg i Åmotsdal. Med sjarmerande gardshus som klamrar seg oppetter den bratte lia er dette bustaden til budeia heile sommaren. På toppen er det ein fantastisk utsikt som aleine er verdt eit besøk. Det er eit rørande samspel mellom geiter, kyr og folk.

Ekteparet Irene og Jon Aarbakk driv Nystaul. Her kan du bli med og sjå på ysting og lære korleis geitene og ammekyrne held landskapet i hevd ved å beite ned gras og småbuskar. Du kan også lære om samanhengen mellom mat og dyrehald. Om dagen er dyra ofte ute i landskapet der dei går fritt, men ved kveldstid kjem dei heim for å mjølke.

Om du skulle ha lyst til å smake stampegraut eller feitegraut etter familiens oppskrifter kan du bestille dette på førehand. Enkel servering utan bestilling. Vertskapet ynskjer velkomen til Nystaul frå omlag midten av juni til slutten av august. Kombiner gjerne turen med eit besøk på Eva Bull Holtes Museum som ligg like ved innkøyringa til Sudbøvegen.