Mellom himmel og halm - Sommarutstillinga på Kunstlåven i Seljord

Om

Mellom himmel og halm – sommarutstilling på Kunstlåven
Velkomen til «Mellom himmel og halm» på Kunstlåven i Seljord.
Utstillinga er ein del av den tradisjonsrike sommarutstillinga i Seljord, og er laga i samarbeid mellom Seljord Kunstforening og Seljord Husflidslag.
I «Mellom himmel og halm» møter publikum halmarbeid, himmeli, hengande konstruksjonar og kunstobjekt av Mari Bryhni og Gjertrud Hals.
Utstillinga tek utgangspunkt i halm, halmkroner og gamle handverkstradisjonar. Eit viktig referansepunkt er Hovlandkruna frå Hjartdal, ei halmkrune tidfest til mellom 1660 og 1700. Den originale kruna er eigd av Telemark Museum og er i dag for skjør til å vere i aktiv bruk. Hausten 2025 laga husflidshandverkar Mari Bryhni ei ny krune med inspirasjon frå den gamle. Det er denne nye kruna Seljord Husflidslag har fått låne til utstillinga i Kunstlåven.
Mari Bryhni viser fleire nylaga halmkroner og himmeli, både med utgangspunkt i tradisjonelle teknikkar og i meir samtidige uttrykk. Gjertrud Hals viser hengande former og trådarbeid i ulike materiale, der teknikkar som vikling, binding og konstruksjon skaper samband mellom handverk, rom og kunst.
Utstillinga viser eit stort spenn av uttrykk med røter i ein gamal handverksteknikk.
Kunstnarar:
Mari Bryhni
Gjertrud Hals
Utstillinga er open kvar dag i juli kl. 11.00–17.00, også 1. juli.